Davao de Oro – Patay ang usa ka babayi human gipusil sa wala mailhing suspetsado sa Purok 6 Brgy.Poblacion, Compostela, Davao de Oro.
Sumala sa report sa Compostela Municipal Police Station, ang biktima mao si Lovely Barrios, negosyante, dunay kapuyo ug residente sa nahisgutang lugar.
Subay sa inbestigasyon, samtang naglingkod sulod sa ilang videokehan, kalit miabot ang wala mailhing suspetsado nga naka-jacket, nagkalo, naka-mask ug sa walay pagduha-duha gipusil ang biktima gamit ang .45 kalibreng pistola sa makadaghang higayon hinungdan sa iyang hinanaling kamatayon.
Samtang patay usab ang usa ka mag-uuma human gitigbas sa iyang kainom alas 2:00 sa kadlawon sa Purok Mangga, Brgy.Tupas, Maragusan, Davao de Oro.
Biktima giilang si Fernado Lapinid, 26 anyos, mag uuma, dunay kaipon ug nagpuyo sa Barangay Talian, Maragusan, Davao de Oro.
Suspek giila nga si Botchoy Saromines, hamtong ang edad minyo, mag-uuma, residente sa nahisgutang lugar.
Sumala sa report sa Maragusan Municipal Police Station, nag-inom ang duha kauban sa ilang mga higala apan nagkalalis hinungdang gitigbas sa suspek ang biktima sa makadaghang higayon nga miresulta sa hinanaling kamatayon.
Suspetsado daling milayas human sa insidente.
RadyoMaN Jules Catisay
