Patay ang 38 anyos nga negosyante human kini gipusil sa wala mailang riding in tandem, pasado alas-10:00 kagahapon sa buntag sa Barangay Matampay, Marawi City.
Giila ni Colonel Madzgani Mukaram, director sa Lanao del Sur police, ang biktima nga si Sohaily Domagay Pandapatan, kasamtangang nagpuyo sa Bayanihan Village sa Barangay Sta. Elena, ning dakbayan sa Iligan.
Sa record sa kapulisan, taga-Barangay Alinun, Saguiaran, Lanao del Sur si Pandapatan apan dili tin-aw kung unsay negosyo niini.
Sa inisyal nga imbestigasyon sa kapulisan, sakay sa iyang motorsiklo ang biktima gikan sa Marawi City paingun ngadto sa direksiyon sa Saguiaran dihang kalit gipusil sa suspek.
Nadala pa sa hospital ang biktima apan gideklara kining dead on arrival.Nakuha sa Scene of the Crime Operatives (SOCO) gikan sa crime scene ang mga basiyo sa kalibre 45 nga posibleng gigamit sa pagpamusil.
Gi-imbestigahan pa sa pulisya ang motibo ug ang pag-ila sa mga suspek sa kremin.
Kung kahinumduman nga niadtong Marso 5, patay usab sa pagpamusil didto sa Marawi ang usa ka pulis samtang nagmaneho sa iyang sakyanan kauban ang iyang singko anyos nga anak.
Samaran ang bata sa maong pagpamusil apan naa na kini sa luwas nga kahimtang. (Divina M. Suson, March 11)
