Usa ka negosyanteng babaye ang gitulis ug gipusil mga alas kwatro kaganihang kadlawon sa Vegetable Landing Area sa Westbound Terminal sa Barangay Bulua ning syudad.
Matud ni Police Chief Master Sergeant Camaloding Macmac, imbestigador sa Bulua Police Station nga ang biktima nailang si Jackelyn Ancis, 43 anyos, minyo ug taga Tipolojon, Claveria, Misamis Oriental.
Gibutyag ni Police Chief Master Sergeant Macmac nga sa dihang nigawas sa terminal ang biktima human nangape kalit kining giduolan sa duha ka suspects ug gilabni ang iyang sling bag.
Tungod kay nisukol ang negosyante, gipusil kini sa duha ka higayon sa iyang tiil busa gidala gilayon kini sa ospital.
Nakuha sa nakabonet nga mga suspects ang 40-mil pesos kapin kon kulang ug daling misibat.
