Mapasalamaton ug dako si Outgoing Mayor ug Governor Elect Rosalina “Nene” Jalosjos sa nahimong kalampusan sa buhatan sa Agriculture nga nakatabang sa panginabuhian sa mga mag-uuma ug nakatabang sa pagsumpo sa kalisud sa katawhan. Kini maoy unod sa mensahe nga gipadayag niini atol sa gipahigayon nga Ceremonial Distribution of Agricultural Inputs and Assistance sa mga mag-uuma didto sa City Agriculture Compound nga girepresentahan ni Konsehal Ronie Jarapan isip maoy Committee Chair on Agriculture. Ang maong programa dako’g ikatabang sa mga mag-uuma ug mga katawhan diin kini maoy naghulma sa tinuod nga tinguha sa kagamhanan nga mausab ang nawong sa ekonomiya. Nagkanayon pa ang inahan sa dakbayan sa iyang mensahe nga iyang gisalig ang katakos sa pagtuman sa tahas nga anaa sa ilang responsibilidad diin uban ang kagamhanang lokal sa malig-on nga tinguha nga makab-ot ang kaayuhan sa kinabag-ang katawhan. Mapasalamaton usab si Gov. Elect Nene Jalosjos sa mga kadagkuan sa Department of Agriculture nga maoy katambayayong sa pagkab-ot sa kagamhanang lokal nga mahatud sa kabarangayan ang gitinguha nga kauswagan diha sa kahimtang sa mga katawhan. Sa maong kalambuan kanunay nga nagpaluyo ang administrasyon ni Jalosjos sa tanang mga programa ug proyekto nga makahata’g kalambuan sa kahimtang sa mga katawhan uban sa paningkamot aron magmalampuson ang tanan nga tinguha sa kasaligan nga ekonomiya nga mapahimuslan sa kadaghanan. (MitzieADulawan)
Facebook Comments
