Davao City – Aron mahatagan og proteksyon ang mga kabatan-onan nga dili ma-impluwensyahan sa palibot, gitinguha karon sa Chairman sa Committee on Information and Technology sa Konseho sa syudad sa Davao nga hatagan og kopya sa Internet Café Ordinance ang tanang mga barangay officials sa syudad aron ilang mapatuman sa ilang tagsa-tagsa ka mga barangay.
Una niini gisulti ni Davao City 1st District Councilor Joanne Bonguyan-Quilos, Chairman sa Committee on Information and Technology nga anaa nay ordinansa ang syudad aron maproteksyonan ang mga kabatan-onan batok sa sobrang paggamit sa internet sa ilang mga lugar apan wala lamang kini hingpit napatuman.
Tungod niini, iyang ipatawag sa konseho ang tanang mga barangay officials aron ipasabot kanila ang maong ordinansa aron mapatuman sa ilang tagsa-tagsa ka mga lokalidad.
Nanawagan usab si Quilos sa mga ginikanan nga dili usab nila pasagdan ang ilang mga anak nga mag-internet sa sobra na nga oras ingon man ang mga nanag-iya’g mga kompyuteran nga tumanon ang mga patakaran nga gimando sa ordinansa.
RadyoMaN Bernard Pantallon
