Davao City – Usa ka maayo nga katikaran ug kalambuan alang sa mga kababainhan ang paglusot sa ikatulo ug pinal nga pagbasa sa House Bill No. 8244 kun Expanded Anti-Sexual Harassment measure sa hawanan sa kongreso.
Ang Expanded Anti-Sexual Harassment Bill magpalig-on sa Republic Act 7877 kun Anti-Sexual Harassment Act of 1995 sa paglutos sa kalalakin-an nga mangabuso-sekswal sa mga babaye.
Pinaagi sa maong balaud, ang kababainhan puwede na magduso og kaso batok sa laki nga mag-abuso-sekswal bisan og kini nahitabo gawas o sulod sa trabahoan ug uban pa nga institusyon.
Ubos sa bag-ong balaud, ang kanhi silot gikan sa P10,000 hangtud P20,000 ug pagka-preso sulod sa unom ka buwan gihimo na kini karon og P50,000 ngadto sa P200,000 ug pagkapreso sulod sa unom ka buwan.
Gikalipay man ni Mindanao Migrant Center and Empowerment Action Executive Director Inorisa Elanto ang maong balaud, apan dili kini sold-out sa kantidad sa penalty.
Imbes padak-an ang kantidad sa multa, mas maayo kung ang pabug-atan ang duration sa pagka-preso hilabi na kung ang biktima hingpit napusgay ang pagkababaye niini, matud ni Elanto.
Nanghinaut si Elanto nga dili lang hangtud sa papel ang bag-ong balaud ug mapatuman gayod kini aron sa ingon wala na’y babayeng mabiktima sa sexual harassment sa mga kalalakin-an.
Gidasig ni Elanto ang gobyerno nga paspasan ang paglusad og education campaign sa balaud aron mugawas nga may igong kahibalo ang tanan kalabot sa Expanded Anti-Sexual Harassment Law.
RadyoMaN Joel Viray
