Davao City – Aron dili mapareho ang Region Eleven sa kaulohang Manila ug Cebu nga misutoy ang kaso sa COVID_19 human gipaluagan ang quarantine control, dili angay ikanaug ngadto sa ‘New Normal’ ang estado sa Davao City aron kalikayan ang pagkuyanap sa virus diha sa komunidades.
Matud ni Mindanao Advocacy and Social Communication Focal Person Candido Aparece Jr, ma-General Community Quarantine (GCQ) o ma-Modified General Community Quarantine (MGCQ) man, importanteng adunay magpabiling quarantine measures aron mapuggan ang pagsaka sa kaso sa rehiyon.
Igo nang kapanaminan ang kahimtang karon sa kaulohan dihang giluagan sa gobyerno ang quarantine sa pagtan-aw sa sitwasyon karon sa rehiyon diin sa maong paagi, malikayan ang paspas nga pagsaka sa makamatay nga balatian karon, segun ni Aparece.
Kung aduna ma’y ablihan nga mga industriya, seguraduhon lamang nga kadto lamang mga factories ug mga tindahan apan pabilin gihapon nga tumanon ang ‘work-from-home’ scheme, dugang ni Aparece.
Gipalanog usab sa grassroots empowerment advocate nga gikinahanglan nang makabalik sa trabaho ang minilyon ka mga trabahante aron dili na maglisod karon sa pagpakaon sa tawo ang estado basta ang siguraduhon usab sa mga industriya ug sa publiko nga istriktong sundon ang pagsul-ob og facemask ug social distancing aron dili na mo-grabe pa ang kaso sa COVID-19 sa rehiyon.
Ang reaksiyon ni Aparece nagsumikad sa nanghinapos na nga mga adlaw sa implimentasyon sa Extended GCQ sa dakbayan sa Davao nga matapos na karong June 15.
RadyoMaN Joel Viray
