Davao City – Dako ang pagsalig sa Parents Mobilization Action Group (PMAG) nga walay magpasaway sa mga Dabawenyo atol sa pagsugat sa bag-ong tuig duha ka adlaw ug pila ka oras gikan karon.
Kampante si PMAG focal person Febe Matthew nga walay magpabadlong sa mga Dabawenyo atol sa bis-peras ug pagsugat sa bag-ong tuig ug tamuron gayod sa tanan ang firecracker ban sanglit ‘zero casualty’ sa paboto ug discriminate firing ang dakbayan kapin napulo na ka tuig nakalabay.
Dakong pabor si Matthew sa kamandoan ni Pres. Rodrigo Duterte nga limitahan ang mga lugar nga puwede makapabuto ang mga tawo pinaagi sa pagbutang og designated area aron sadya ang pagsugat sa bag-ong tuig.
Apan dili makasiguro ang focal person kun sento porsento ba tumanon sa mga tawo sa tibuok nasud ang pagbuto sa mga designated area.
Dinhi sa dakbayan, walay pagduda nga walay mga Dabawenyo magpabuto karong bag-ong tuig sanglit naanad naman ang kadaghanan nga ang madunggan nga kabanha mao ang mga kaldero, busina sa mga sakyanan ug uban.
Lisod masulti nga walay magpabuto og armas de fuego panahon sa new year sanglit adunay uban kun mahubog na gani ang tendency mangatol ang kamot ug mukablit dayon sa pistola aron lang matagbaw sa selebrasyon sa bag-ong tuig, dugang ni Matthew.
Ang mga pagdasig na lamang niini para sa tanan mao nga mag-ampo ug magpasalamat sa Dios tungod kay gipalatas kita aning tuiga luyo sa daghang pagsulay nga miabot sa atong kinabuhi.
Apan karon nagpaabot na lamang ta nga musulod ang laing tuig sa atong kinabuhiug uban sa pagsalig sa Dios nga kita iyang pagabubuan sa nag-awas-awas nga mga panalangin alang sa tibuok tuig 2018.
RadyoMaN Joel Viray
