Davao City – Sa mga nasud nga nagsunod sa Gregorian calendar, matag hinapos sa tuig, nagahimo gayud og New Year’s Resolution diin nahipatik ang mga butang nga gusto nilang himoon ug dili nila buot buhaton pagsulod sa Bag-ong Tuig.
Sumala ni Mindanao Development Authority (MinDA) Spokesperson Prof. Adrian Tamayo, dili lamang ang Pilipinas kun mga Pilipino ang nagabuhat og New Year’s Resolution apan lakip na usab ang ubang mga nasud nga nagtoo sa Gregorian calendar.
Ang New Year’s Resolution parte ug tradisyon na sa kadaghanan kinsa nagtinguha nga magbag-o og direksiyon sa pagsiguro nga dili gihapon magpabilin nga walay pulos apan may paglambo na sa kinabuhi paghuman sa pagsulod sa Bag-ong Tuig.
Gipahinumdoman ni Tamayo ang katawhan nga ang New Year’s Resolution giya lamang kini sa mga butang nga gusto natong usabon ug kab-oton alang sa tibuok tuig apan ang pagsunod ug pagtuman sa mga gipangandoy mag-depende gihapon sa mga magbuhat niini.
Tambag ni Tamayo ngadto sa tanan nga ang angayang pangandoyon nato mao kadtong realistic nga mga butang sama sa pagpalig-on sa relasyon sa pamilya ug sa ubang tawo ug dili mangandoy og mga butang nga daw sama sa bulan kalayo nga makab-ot.
Matud ni Tamayo, gikinahanglang praktikal ug realistic ang anaa sa New Year’s Resolution aron matuman ug matinuod gayud ang gustong mahitabo sa kinabuhi pag-abot sa usa ka tuig nga tagal.
Dugang tambag sa maong opisyal nga sigurohon usab nga may lig-on nga relasyon sa pamilya ug sa katilingban kay makatabang kini sa pagkab-ot ug pagkumpleto sa gitumong nga kausaban.
RadyoMan Joel Viray
