Sa report sa Tagum City Police Station, usa ka Alyas Jean, 16 anyos ang gidala sa ospital tungod sa bleeding apan gikumpirma sa doktor nga nanganak na ang maong babaye ug giabisuhan ang pamilya nga pangitaon ang baby tungod ang inahan misulting wala siyay gihimugsong bata.
Sa gipalawmang imbestigasyon, June 24 sa hapon, adunay mga batang giingong nakakita kang Alyas Jean nga nagdala og cellophane bag padulong sa likod sa apartment. Ug paglabay sa adlaw, didto na nakita ang baby girl nga wala nay kinabuhi.
Sa interview sa DXDC RMN Davao kang PLtCol. Wildemar Tiu, hepe sa Tagum City PNP, iyang gibutyag nga naki-alayon kanila ang City Social Welfare and Development Office (CSWDO) aron imbestigahan ang panghitabo. Ug ang 16 anyos nga si Alyas Jean, mamahimong muatubang sa kasong infanticide.
“We are coordinating that with the CSWD and actually nakurat sad sila kay first time sad sila naka-encounter ani. Unsay recommendation and disposition nila, they will be filing for a case. Deliberately man gyud to, gilabay man without any assistance sa any medical practitioner nato. Gipanganak niya unya murag basura ba gilabay,” sulti ni Tiu.
Kahinumdoman nga niini lang semanaha sa Hunyo, napalgan ang usa ka fetus sa Sasa, Davao City ug laing pang duha nga gisulod og plastic container sa Tondo ug Batangas sa Manila nga gikasuko karon sa netizens.
“Unta dili sila maghimo og butang nga dili nila kaya panindigan. Parehas ana karon nga nagpabuntis sila unya ila ra diay ilabay. So, dapat magmatngon sila sa ilang kaugalingon nga dili sila masugamak ana nga panghitabo. Naa man gyuy nilugdangan na ilang binuhatan. Kay unsa imong gitanom, magbunga man gyud. Nakasala ta sa tawo ug Ginoo ana ilang gihimo kay anghel pa gud na ilang gilabay,” komento sa dabawenyang si Dolly Tan.
RadyoMaN Ivy Parido
