Davao City – Tino nga usaka pagbiay-biay ngadto sa katawhang Pilipino ang alegasyong paggamit sa pondo nga P5.1 billion sa National Food Authority (NFA) sa pagbayad sa utang inay alang sa rice procurement.
Subay kini sa pagsita sa Commission on Audit (COA) sa (NFA) sa giingong paggamit sa nasangpit nga pondo nga ilang nadawat gikan sa national government niadtong miaging tuig nga alang unta sa stabilisasyon sa supply ug presyo sa bugas-humay ug mais.
Sumala ni kanhi Davao City Chamber of Commerce and Industry Inc. (DCCCII) President Tony Dela Cruz, makonsidera usab nga pagtamparos ang maong buhat sa grains agency ngadto sa katawhan ug sa gobyerno ug sukwahi usab kini sa palisiya nga buot ipatuman sa administrasyon ni Duterte nga hatagan og pagtagad ang kakulangon sa bugas sa nasud.
Dugang ni Dela Cruz nga angay tutukan sa pamuno-nasud ang mga tawo sa maong ahensya ug himuan og aksyon sama sa pagtaktak ensigida sa mga buluyagong opisyales sa AFP V. Luna Medical Center ug Nayong Pilipino Board of Directors.
RadyoMaN Renz Barbarona
