Mariing itinanggi ni National Food Authority (NFA) Palawan Provincial Manager Osmundo Guinto Jr. ang napaulat na inaamag na ang bigas na ibinigay sa lokal na pamahalaan ng Puerto Princesa.
Batay sa report, mismong si Puerto Princesa Councilor Victor Oliveros ang nagrereklamo sa hindi magandang kalidad ng bigas na ipapamahagi sana sa mga residente habang umiiral ang Enhanced Community Quarantine (ECQ).
Agad na nagpadala si Manager Guinto ng classifier at pest control Officer sa lungsod upang inspeksyunin ang rice stocks pero lumilitaw na negatibo ito sa amag.
Tinawagan din ni Manager Guinto si Councilor Oliveros pero Itinanggi ng konsehal na nagbigay siya ng naturang komento sa isang diyaryo.
Apela ni Guinto sa mga LGUs, sakaling mapansing hindi maganda ang kalidad ng kanilang rice deliveries sa, mainam na ipagbigay-alam agad sa ahensya para agad na mapalitan.
Tiniyak niya na nasa magandang kalidad ang bigas ng NFA sa Palawan.
As of April 3, nakapagpalabas na ang NFA Palawan ng abot sa 31,000 bags ng bigas sa mga local government at relief agencies sa probinsya na nasa ilalim ng ECQ.