NFA rice, ni-abot na sa Bukidnon: Distribution, lauman sa musunod nga mga semana

Niabot na sa probinsya sa Bukidnon ang NFA rice ngagikan sa Vietnam ug Thailand.

Sa interview sa RMN Malaybalay ngadto kang NFA Bukidnon Provincial Manager Ma. Celeste R. Gaabucayan gibutyag niini nga nidunggo na sa Cagayan de Oro City ang barko nga gikargahan sa maong mga NFA rice.

Matud ninii nga sa rehiyon 10 adunay alokasyon nga 208,000 bags ilawom sa G to G importation. Sa nidunggo nga barkong gikargahan sa maong mga bugas nga mukabat sa 92,000 bags ang napadala na sa lima ka mga probinsya sa rehiyon ug sa Marawi City.


Sigun niya nga sa mao nga ihap mukabat na sa 1,500 ka sako ang na unload sa bodega sa Barangay Aglayan kagahapon ug madugangan pa kini sa sunod nga mga adlaw.

Gidugang sa provincial manager nga target nila nga mabutangan ug bugas ang tanang bodega nga ania sa Bukidnon.

Gibutyag niini nga hinay ang pag-abot sa mga bugas tungod sa pagsirado sa pipila ka oras sa Mangima Bridge.

Lauman nga adunay display na nga NFA rice sa katapusang semana sa Hunyo o kaha sa unang semana sa Hulyo sa mga pwesto sa bugasan sa kamerkaduhan ug sa mga NFA outlets nga anaa sa mga barangay dinhi sa Bukidnon.

Facebook Comments