Davao City – Supisyente na ang supply sa bugas sa Davao City kini human midunggo na sa Sasa Wharf ang barko nga nagkarga sa nilibo ka sakong bugas nga giangkat gikan sa Thailand ug Vietnam adtong Lunes.
Gisugdan ang pagdiskarga sa mga sinakong bugas gikan sa barko Martes sa buntag ug gilayon gi-deliver sa bodega sa NFA Davao City sa may Sta. Ana Avenue siyudad sa Dabaw.
Apan dili pa dayon masugdan ang pag apod-apod sa NFA rice ngadto sa kapin gatos ka retailers ug sa mga rolling store tungod aduna pa’y proseso subayon alang sa distribution.
Malaumon si NFA Davao Manager Leonila Selpa nga mubarato na ang presyo sa bugas sa kamerkadohan tungod sa NFA rice nga mapalit lang sa mas ubos nga kantidad itandi sa mga commercial rice.
Gisulti ni Selpa nga mas musupisyente pa ang supplay sa bugas sa siyudad gumikan sa laing 100 thousand NFA rice sacks shipment gitakda muabot dinhi sa siyudad karong buwan sa Hulyo.
Makalaum matud pa ang mga Dabawenyo nga walay mga traders makakumpra og NFA rice sa ilang buha-tan tungod hugot kini gidili ug ang bugtong makapalit mao lang ang accredited retailer ug rolling store.
Gihimo ang pagtin-aw sa opisyal aron mawagtang ang pagduda sa katawhan nga basin mapaingon sa mga traders ang dakung porsyento sa NFA rice stock aron ihalo sa mga commercial rice, segun sa opisyal.
RadyoMaN Joel Viray
