Davao City – Klaro ang kamatooran nga adunay natigayon nga manipulasyon sa suplay sa bugas sa merkadohan sa tibuok Pilipinas.
Suma ni Farming Advocator Organization Nationwide (FAON) focal person Tito Porras nga klaro kaayo nga peke ang NFA rice shortage ug adunay nagmani-obra niini aron magkuwang ang suplay sa mga merkado sa tibuok nasud karon.
Gikuhaan og basehan ni Porras ang pamahayag ni Department of Agriculture (DA) Secretary Manny Piñol nga dunay igong suplay sa bugas ang nasud mao nga nakasulti kini nga artificial ang NFA rice shortage sa atong nasud karon.
Ug kung si kinsa man ang anaa sa likod sa mao nga senaryo angay gukdon ug pasakaan og kaso sa atong kagamhanan karon.
Kumbensido si Porras nga dili lang sa General Santos City dunay nagtago sa stock sa NFA rice apan lagmit natigayon kini sa daghang lugar sa Pilipinas sama dinhi sa dakbayan sa Davao.
Nahitabo ang pag-curtail sa suplay sa bugas tungod mismo ang pipila ka mga empleyado ug mga opisyales sa NFA nakigsabwatan sa mga negosyante sanglit dili mahitabo ang pagtago sa stocks kung walay kakunsabo ang mga traders sulod sa ahensiya.
Matud ni Porras nga daw muapas sa gibug-aton sa suliran sa droga ang rice shortage kung pasagdan sa kagamhanan ang mga opisyales sa NFA ug mga negosyante nga makapadayon sa ilang panikas.
Ug tungod ani, angay lang daw pod i-tokhang ang mga tawo nga anaa sa likod sa rice shortage aron maulian ug masilotan tungod sa gimugna nga kaguliyang sa atong nasud karon.
Nagpahimangno pa kini sa gobyerno nga dili pasagdan ang krisis sa bugas ug gilayon muhimo og lakang aron masulbad sa dili masusama sa suliran sa droga sa nasud ang mao nga hisgutanan.
RadyoMaN Joel Viray
