Davao City – Ang kapalpakan sa National Food Autthority (NFA) sa pagbaton og igong supply sa NFA rice gipahimuslan og taman sa dagkung mga negosyante og bugas pinaagi sa pagpasaka sa presyo sa ilang baligya nga ‘commercial rice.’
Pipila sa mga lugar sa nasud karon kinsa nakasinati sa kulang nga supply sa NFA rice mao ang mga lugar sa Zamboanga Peninsula diin mokostar na sa P70 ang matag kilo sa commercial rice didtong dapita.
Ug tungod niini, dili na angayan padugayon pa sa pwesto ang mga opisyales sa National Food Authority ug sipaon na sila gikan sa katungdanan gumikan sa nasinati nga shortage sa NFA rice karon.
Si Alliance of Progressive Labor Group Secretary-General Joshua Mata nagsulti nga posibleng adunay connivance kun panagkonsabohay sa pipila ka mga opisyales sa NFA ug dagkung negosyante aron ipagawas nga kulang gayod ang NFA rice karon.
Buot ni Mata nga imbestagahan ang mga opisyales sa NFA nunot sa pagduda nga basin nagkunsabo ang pipila ka opisyales ug mga negosyante sa nahitabong scenario.
Dugang ni Mata, si Pres. Rodrigo Duterte ang angay manubag sa sipyat ug kapalpakan sa mga opisyales sa NFA tungod sa prinsipyong ‘command responsibility.’
RadyoMaN Joel Viray
