Kinastigo ni AnaKalusugan Party-list Rep. Ray Reyes ang National Grid Corporation of the Philippines o NGCP dahil sa paulit-ulit na nararanasang power interruptions sa Luzon.
Dismayado si Reyes na bigo ang NGCP na pigilan ang mga brownouts kahit batid nito na tumataas ang demand o konsumo sa kuryente tuwing summer.
Pinaalala rin ni Reyes na tag-ulan pa lang ay hinahanapan na niya ng kontrata sa ancillary services ang NGCP.
Ang ancillary services ay back-up power supply agreements sa mga power generation companies na alternatibong pagmumulan ng suplay ng kuryente sa oras na pumalya o magkaproblema ang regularly-contracted operators na nagsusuplay ng enerhiya.
Giit ni Reyes, mabilis sanang natutugunan ang surge o tumitinding demand sa elektrisidad kung ginawa ng NGCP at ng Energy Regulatory Commission ang kanilang mandato.
