Davao City – Pasakaan og kasong may paglapas sa RA 8485 kun Animal Welfare Act of the Philippines ang mga suspek kinsa nisunog-patay sa iro sa may Tahimik Avenue, Matina, Davao City.
Sa pakighinabi sa RMN Davao kang Talomo PNP station commander PCI Ronald Lao nga ilahang giandam ang mga affidavits aron ilahang iduso na kini ngadto sa piskalya.
Matud ni Lao nga bisan pa man gawasnon karon ang mga suspek paabuton lamang nila ang warrant of arrest aron hingpit nila kining madakpan.
Nagbahad si Lao ngadto sa mga taga-Talomo nga gapang-ihaw og iro nga hugot kining gidili sa balaod.
Gibutyag ni Trina Duran kinsa nakaakto ug nakakuha og video giila niini ang mag-amahang Armando Pulbos usa ka sekyu, Epifanio Pulbos ug laing duha pa ka mga indibidwal nga maoy giingong nipatay ug gipulutan ang iro sa ilahang silingan.
Pursigido kining kasuhan ang mga suspek.
“Dapat masilotan ang mga sad-an tungod ani nga hinimuan. Unsay used sa balaod kung dili nato ni pahingusgan. Unta ma-realized ug madungog sa mga tao that you should not let fear beat you kay you should be the voice of the voiceless like the animals,” matud niini.
Nanghinaot karon si Animal Rescue Rehabilitation & Fostering (ARRF) Davao Inc., Founder ug Senior Animal Welfare Advocate Marites Batacan nga madakpan ug mapriso ang mga brutal nga nipatay sa iro.
“Makaingon ta so far this is a strong case no kay nibarog gyod atong complainant unya naa tay bug-at nga ebidensiya. Sa nagbuhat niini paabuta lang nga mulihok ang balaod kay kung dili naa pod biyay karma,” matud ni Batacan.
RadyoMaN Aimee Guinita
