Davao City – Gilaraw karon sa Philippine Coastguard Davao nga idili na ang pag-night swimming sa mga resorts sa Island Garden City of Samal.
Gibutyag ni PCG Davao Station Commander LTC George Maganto nga gikatakdang makigpulong ang Coast Guard Davao sa Department of Tourism sa Samal ug sa di muubos sa 65 ka mga tag-iya og mga resorts sa Samal sunod semana aron ihanyag kini nga proposal ngadto kanila.
Matud ni Maganto aron malikayan na ang mga insidenteng pagkalunod sa mga turista o mga bisita sa resorts ilabina inig kagabie.
Base sa proprosal sa PCG Davao wala nay mangaligo lampas alas 8 sa kagabghion.
Segun ni Maganto kung dili man tanang resorts ang mutuman niini gikinahanglan nga mutunol og waiver ang mga tag-iya aron sila gayod ang manubag kung aduna may mga mahitabong pagkalunod o uban pang matang sa mga aksidente diha sa kadagatan.
Gawas usab niini hisgutan usab sa maong meeting ang pag-comply og mga lifeguards, ug paghatag og seguridad sa tanang mga bisita ilabina karong summer nga daghang mga turista ang mangabot gikan sa nagdakaiyang mga lugar gawas o sulod sa nasud.
RadyoMaN Aimee Guinita
