Davao City – Ang kahuyangon og kawalay katagbawan ang rason ngano makahimo gihapon og binuang ang pipila ka pulis sama sa ninja cop nga nag-recycle og iligal nga droga nga ilang nakumpiska sa operasyon kontra droga.
Gibutyag ni DILG 11 Director Alex Roldan nga wala sa ekonomiya sa usa ka pulis ang problema inay ang kahakog sa butang ang hinungdan ngano adunay mga pulis musulod sa binuang sama sa ninja cop.
Matud ni Director Roldan nga wala na siya’y laing nakita nga rason aron magbinuang pa ang mga pulis tungod sa kadako sa sweldo ug benepisyo matag bulan nga gihatag sa administrasyong Duterte kanila.
Segun ni Roldan nga dili na bag-o ang isyu sa ninja cop kay sukad pa kaniadto gatumaw na sama sa isyu ug labaw na nga dali ra mahaylo ang pipila ka sakop sa PNP hilabi na kun pakitaon og minilyon ka pesos.
Recovery Values Program ang gikinahanglan karon aron dili na maduhigan sa ngil-ad nga imahe ang mga pulis hatud sa silaw sa mga butang maong matintal gayod sila sa sindikatong buhat.
Nagtoo si Director Roldan nga kun mag-usab lang ang mga pulis pinaagi sa recovery values program hayan mahanaw ra sa hingpit ang ninja cop nga milama sa organisasyon sa nasudnong kapulisan niining panahona.
RadyoMaN Joel Viray
