Tungod sa kadaghan sa nadawat nga reklamo subay sa inisyal nga pagpatuman
sa “No bonnet Ordinance” usbon sa kagamhanan sa dakbayan sa Mandaue ang
ordinansa alang niini .
Ang buhatan ni Mandaue City Mayor Luigi Quisumbing niduso ug mga kausaban
ngadto sa konseho , diin gitugot na ang pagsul-ob ug surgical o medical
mask alang sa tanang mga magmotorsiklo sa kadalanan sa Mandaue.
Ang mga hingkod nga lalaki nga maoy drayber o kaha angkas sa motorsiklo
mahimong magsurgical mask apan pabiling did-an sa pagsul-ob ug bonnet ,
ski mask ug balaclava.
Ang mga babaye nga drayber sa motor o angkas ingon man ang menor de edad
mahimong magsul-ob ug bisan unsang face mask gawas lang sa balaclava o ski
mask.
Samtang ang daku kaayo nga multa sa kalapasan sa ordinansa nga P5,000 ,
us-osan na ngadto sa ,P500 alang sa unang kalapasan ; P1,000 sa ikaduha ug
P1,500 alang sa ikatulong kalapasan .
