Davao City – Hugtanong gisupak sa Alliance Progressive Labor (APL) ang posibilidad nga walay matigayong 2019 midterm election nga una nang gipalutaw ni House Speaker Pantaleon Alvarez sa miagi nga adlaw.
Matud ni APL Secretary-General Joshua Mata nga matawag nga ‘undemocratic’ ang plano sa kagamhanan nga dili ihinayon ang piniliay sa 2019 aron matagaan og dalan ang pederalismo nga giduso ni Pres. Rodrigo Duterte.
Busa aduna nay rason ang katawhan aron magbinantayon batok sa dili makiangayon nga tinguha sa gobyerno diha sa pagpugong sa 2019 midterm election.
Pangagpas ni Mata nga opsyon lang ang walay piniliay aron mahikutar ang pagtukod sa pederalismo ug malugwayan ang termino ni Duterte ug sa mga opisyal sa gobyerno.
Giakusahan pa sa secretary general ang mga anaa sa katungdanan karon nga nanghingapin ang ilang kahakog sa gahum sanglit wala pa sila matagbaw sa unom ka tuig sa puwesto.
Kung si Mata ang pasultihon, dili gayod maayo nga ikampanya ug hingusgan ang ‘No Election’ gumikan kay parehong makapaguba sa mga plano sa oposisyon ug sa administrasyon ang walay piniliay sa 2019.
Apan kun ipamugos sa kagamhanan ang ‘No-El’ scenario, usa lamang ang buot ipasabot niini nga mao nga wala sa dughan sa mga opisyal ang interes sa katawhan inay ang ilang mga personal interest lamang.
Gibati og kabalaka si Mata nga basin musangkona hinoon sa kaguliyang ug kagubot sa atong nasud ang maong senaryong giduso sa pipila ka sektor.
RadyoMaN Joel Viray
