Davao City – Nasabutan sa pamilya sa amahan kinsa giingong naghikog-patay sulod sa prisuhan sa Sasa PNP nga ilang i-claim ang patayng lawas niini sulod sa morgue sa Southern Philippines Medical Center.
Sa interbyu sa DXDC 621 RMN Davao sa bayaw niini nga nadesisyonan na nila nga kuhaon ang ilang kabanay.
“Paningkamutan nalang namo nga makapangayo mi’g tabang aron mapahipos lang siya kay wala gyod intawon miy mga kwarta ani,” sumala niini.
Gibutyag usab niini nga ang 70 anyos nga amahan sa suspek wala na untay plano nga mu-claim kay anaa pa kiniy kasuko tungod sa gihimo niini ngadto sa iyang 3 anyos nga anak kinsa gisuspetsahan nga iyang gidauban.
“Katong time nga pagkahitabo naglagot gyod siya, wala gyuy nibisita sa iyaha didto sa prisohan. Katong gi-deny niya nga wala niya gihimo unya ang istorya sa sa iyang mga igsuon nga bisan pa’g unsa ka kahubog kung nakita nimo ang imong anak nga gidauban sa laing tao dili kaha ka mahuwasan?” sumala sa bayaw sa suspek.
Kumbinsido usab ang pamilya niini nga gihunos gayod sa suspek ang iyang kinabuhi ug wala kiniy foul play.
“Iyaha naman gyod ng tinuyuan kay katong niaging semana nag-attempt man pod na siya’g hikog, nagparok sa iyang ulo sa semento,” sumala niini.
Sa pikas bahin andam usab si Sasa PNP Station Commander PCI Emerson Pugong kung aduna may himuong imbestigasyon kalabot sa insidente aron lamang malimpyuhan ang ilang pangalan sa mga spekulasyon.
Busa gipahugtan nila ang pagbantay usab sa ubang mga piniriso aron dili masubli nga adunay magbigti sulod sa selda.
RadyoMaN Aimee Guinita
