Davao City – Giuyunan sa usa ka Barangay Kapitan sa Davao nga dili i-apil sa Free Hospitalization kadtong mga COVID-19 patients nga mataptan gumikan misupak sa mga ginapatumang balaod ubos sa Enhanced Community Quarantine kun ECQ.
Subay kini sa usa sa mga gisaysay ni Davao City Mayor Inday Sara Duterte-Carpio nga dili i-cover sa gobyerno ang mga paysenteng magka COVID-19 kung mataptan gumikan sa kagahi’g ulo human nga naobserbahan sa alkalde nga daghan gihapong mga sakyanan ang nagabyahe sa syudad karong panahona.
Sa pakighinabi sa DXDC RMN Davao kang Kapitan Eduardo Bocboc, Brgy. Captain sa Riverside, Calinan ning syudad, giingon niini nga og unsa may desisyon ni Mayor Inday mao ang sundon gumikan kini mao usab ang lantaw nila nga makaayo.
Samtang gibutyag sa kapitan nga kontrolado nila ang paggawas-sulod sa mga tao sa nahisgutan nga barangay diin sumala niini nga hugot ang ilang pagpatuman sa checkpoint sa lugar.
“Wala ra naabusaran (ang FM pass)… okay ra man… sa among barangay, naay talagsa nga mudaghan mga tao pero gina control gyud namo dinhi… naay pipila ka mga (private vehicles) amo lang gina control sad, naa sad mi checkpoint, di makagawas kung way FM pass.”
Sa karon mas gipahugtan usab sa kapulisan ug kasundaluhan ang control points sa kadalanan sa syudad aron masigurong makontrola ang paggawas sa mga tao ubos sa Enhanced Community Quarantine gumikan sa COVID-19.
RadyoMaN Renz Barbarona
