Davao City – Himuon na nga mandatory ang paggamit sa Safe Davao Quick Response kun DQR sugod karong adlawa (Nobyembre 23, 2020) nga gamiton sa mga publiko ug pribadong opisina ug establisyemento sa syudad sa Davao.
Ilawom sa executive order 60, ipatuman sab ang No QR code, no entry policy sa dakbayan.
Una nang gipahimangno ni Davao City Mayor Sara Duterte-Carpio nga kinahanglan nga gamiton sa mga essential transactions ang DQR diin awtomatik nga kanselahon ang maong QR code sa higayong abusohon kini sa usa ka indibidwal.
“If you are using DQR for non-essential movement, nag upload ka og fake ID, nagpahiram ka sa imong DQR sa laing tao, or other forms of abuse sa paggamit sa DQR, ang imuhang DQR shall be automatically cancelled,” tataw sa Alkalde.
Dugang sa Mayor nga dili usab kini angay ipagamit sa uban ug likayan ang pag post ug pag share niini sa uban aron malikayan ang identity theft kun pagkawat sa imong personal nga impormasyon.
Nasayran nga tumong ug tuyo sa paggamit sa DQR nga mapalapad ang contact tracing batok sa Coronavirus Disease 2019 (COVID-19) ug makontrola ang non-essential movements sa katawhan.
RadyoMaN Kirby Manzon
