Totalmente hay implementa ya na venedero mez de Febrero con el Ordinance 2017-32 o el “No Smoking Ordinance” que ta prohibi contodol mga vivientes puma na mga lugar publico y mga establisemiento privado y de govierno.
Na entrevista del RMN Zamboanga, el otor del tal ordinansa consejala Myra Paz Valderossa-Abubakar ya habla cay este amientdao ordinansa ta stipula el mga provisiones que ya falta durante el pasada del antes semejante ordinansa del 2013.
Presentamente, siendo pinalisao ya este, novaya hay implementa coneste insiguidas para cumpli el publico apenas firma coneste el alcalde del ciudad y publican a mga periodico local.
Asegun con el consejala, que stipulao tambien aqui el mga regulasyon y prevensyon de pumar y vender cigarillo con el mga menor de edad.
Alto el pena para con el quien hay viola conest ordinansa. Para el individual violador, el pena ta alcansa na 1st Offense-P1,000, 2nd Offense-P3,000, 3rd siguiente pena de -P5,000 o servicio na comunidad donde ya comete el violaccion.
Na mga establisemiento que hay viola coneste, el pena amo: 1st Offense-P3,000, 2nd Offense-P4,000, 3rd Offense P5,000, 4th Offense -P5,000 y revocaccion del lisensya de negocio.
Hay forma tambien con el Smoke Free Enforcement Team quien hay implementa con el anti-smoking ordinance– *Bhong Simbajon/RMN News*
