Davao City – Gitulisok karon og maayo ni PBA Partylist Representative Jericho Nograles si US President Donald Trump sa tensyon karon sa Tungang Sidlakan human nag-alburoto sa kasuko ang gobyerno ug katawhan sa nasud-Iran nga nagpatay-og sa seguridad sa tibuok kalibutan.
Segun ni Nograles, talandugon gani ang sitwasyon didto sa Middle East gisamutan pa gyod ni Trump human gimando ang usaka drone airstrike sa Iranian convoy nga gikamatay ni top Iranian Major General Qassem Soleimani sa Quds Force sa Iranian Revolutionary Army kinsa igo lang mibisita sa maong nasud.
Sa gibuhat ni Trump, ang trabaho sa mga Overseas Filipino Workers kun OFWs nabutang sa tumang kaalanganin sanglit mapugos sila og pauli denhe sa nasud aron dili madamay sa kasamok nga mibuto karon sa Middle East.
Kini nagpasabot lamang nga mouli dinhi sa Pilipinas ang mga OFWs nga walay malaumang trabaho ug kung aduna man, gamay ra usab ang sweldo dili sama sa mga nasud nga ilang gitrabahoan karon.
Nabalaka ang magbabalaud nga kung mibalos pa ang Estados Unidos sa missile attacks sa Iran ngadto sa US military bases sa Iraq hayan ang maapektohan ang supply sa petrolyo sa nasud diin collateral damage usab ang pagsaka sa presyo niini diin ang labing maigo mao ang ekonomiya sa atong nasud.
Kumpiyansa si Nograles nga paspas ang pagresponde sa nasudnong gobyerno karon aron luwason ang mga Pinoy nga atua sa Middle East diin ang gipangayo sa maong opisyal sa katawhan mao nga musalig sa gihimo sa kagamhanan sa pagkakaron.
Gikumpirma ni Nograles nga gituki na karon sa Kongreso ang pagmugna sa usaka separate ug distinct agency pagailhong ‘Department of OFWs.’
RadyoMan Joel Viray
