Gisaad karon sa pipila ka mga miyembro sa House of Representatives nga ila gayud nga imbestigaran unsa ka tinood nga adunay dinagkung binuang o anomaliyang nahitabo diha sa pagmentenar sa train system sa kaulohang Manila.
Sa usa ka interview, gibatbat ni Puwersa ng Bayaning Atleta (PBA) Partylist Rep. Jericho ‘Koko’ Nograles nga makatarunganon lamang nga lili-on pag-ayo sa duha ka sangay sa balay-balauranan ang integridad sa mga transakyon sa pagpadagan sa atong train system.
Una niini, nikiha ang Busan Universal Rail, Inc. (BURI), maintenance contractor sa Metro Rail Transit Line 3 (MRT-3) kontra kang Department of Transportation (DOTr) Undersecretary Cesar Chavez sa hawanan sa Office of the Ombudsman ‘for graft and administrative complaints.’
Ang complainant nangatarongan nga ang DOTr napakyas sa pagtuman sa balayronon niini ngadto kanila sa kantidad nga P176 million.
Matud ni Nograles, aduna silay gihikutar nga House Bill 1212 kansang tumong mao ang pagsuta unsa ka tinood nga adunay hao-shiao sa pagpalit ug mga peke nga piyesa alang sa duha ka mga bagon kon passenger shuttle alang sa Light Rail Vehicles (LRVs) nga gipalit sa nilabay’ng administrasyon alang sa Metro Rail Transit Line 3 (MRT-3).
Matud ni Nograles, subo kaayong hunahunaon nga niadtong duha ka semana na ang nakalabay, gikataho nga nitirik kun nikagar ang MRT 3 sa walo ka higayon hinungdan sa grabeng pagkulisma-ot ug kadismaya nga gibati sa katawhan sa klase sa train system sa nasud nga mas nailhan sa inefficient service niini.
RadyoMan June Duterte
