Por segunda vez ya dale mira prueva que nohay ta existi el que se llama “Sagahi” na ciudad despues amediante con el suspecho presencia del mencionao grupo na Patalon, pero maga ladron yah ace entrada na opesina y ya ruba cuantos cosas valuables del Webes denoche.
Na entrevista con el barangay capitan del Patalon si Gaudencio Rojas, ta man patrulia sila na entero barrio del webs denoche seguiendo con el rumor presencia del maga Sagahi.
Asegun con Rojas despues del diila patrulia banda alas 12 del medianoche, ya descansa pa el grupo di Rojas junto consu maga tanod na barangay hall.
Mientras ta descansa sila, ya oyi sila ta ladra maga perro atras del barangay hall pero cuando ya checquia sila nohay man tamen sila mira gente.
Ya continua el grupo man patrulia y hasta madrogada cuando ya bira el maga tanod na barangay hall, ya descubri sila conel robo donde el maga ladron ya saca el CCTV camera hasta el monitor, 3 laptop computer sets y ya abre el vault y ya saca con el cen ta recoji el barangay.
Fuera con el barangay hall, ya sale tambien perdido el soundbox na Patalon Elementary School.
Del semana pasao, amediante ta bicia el maga barangay official del Sangali con el alegao maga buruju, ya puede tamen sila agaunta con un ladron desde Mampang.
