Gibati og tumang kabalaka karon ang liderato sa nasud-Pilipinas gumikan sa nagpadayong ‘provocative acts’ sa North Korea sama sa bahad nga paunloron ang Japan ug pangitngiton ang entero kontinente sa America gamit ang thermonuclear weapons.
Sa usa ka news conference sa palasyo sa Malacañang, gitataw ni Defense Sec. Delfin Lorenzana nga gumikan sa atong mga kakulangon ilabi na diha sa military capabilities, bugtong mahimo na lamang nato karon mao ang pagpabarug sa lig-on ug masaligan nga evacuation masterplan.
Kagahapon, subling gitugaw sa North Korea ang world peace sa dihang nagpalupad na usab kini ug bag-ong missile sa airspace sa Japan uban ang warning sa US ally nga paunloron kini gamit ang mga warheads ingon man masinatian sa America ang ilang gibandilyo nga ‘ashes and darkness.’
Ang evac protocol, matud ni Lorezana nagtumong sa pagpreparar nga sa higayon mahitabo ang ‘worst-case scenario’ nga shooting war, ma-activate gilayon nato ang pagpauli sa libo ka libong mga Pinoy nga nagtrabaho o nag-estar karon sa lanyaw’ng kanasuran sama sa South Korea, Japan ug sa mga US territories sama sa Guam ug Hawaii.
Dugang sa kalihim sa nasudnong panalipod nga gumikan sa atong mga kakulangon, ang mahimo lamang nato mao ang paghikutar sa evac plan inubanan sa pagkuyog diha sa usa ka global coalition kontra sa pagkuyanap sa gitawag nga mga ‘weapons of mass destruction’ gilangkuban sa mga nuclear warheads, biological ug chemical armaments.
“We cannot start digging (underground bunkers and air raid shelters….we can only hope and pray (that the missiles will not reach the country,” pasidaan ni Lorenzana taliwala usab sa komon nga kabalaka nga possible nga masipyat ang Nokor sanglit dili perpekto ang teknolohiya o syensya sa kontrobersyal nga nasud ilawom kang dictator Kim Jong-un.
Niadtong panahon sa Cold War, gi-activate sa America ang halapad nga combat defense systems niini sama sa underground bunkers ug air raid shelters puno sa mga kahimanan ug mga panginahanglanon sa mga evacuees sama sa pagkaon, tubig-mainom, medisina ug uban pang mga critical necessities.
Ang North Korea gikataho nga aduna nay katakos nga mopalupad sa mga inter-continental ballistic missiles nga nagdala ug ‘miniaturized warheads’ nga kaya mohatud sa kalibutan sa literal nga Armageddon sanglit moresulta kini sa gitawag nga thermonuclear war pinaagi sa mga modernong hydrogen bombs nga kapila pilo-piloon ang gikusgon sa kilotons sa bomba nga gihagbong sa USA didto sa Hiroshima ug Nagasaki.
Kasamang June Duterte
