Davao City- Suliran sa mga gabyahe gikan Davao Region ang dili magkaparehong patakaran sa laing mga lugar nga ilahang mga adtuan o destinasyon.
Gibutyag ni Alex Roldan, Department of Interior and Local Government Region XI, adunay mga Local Government Units nga nahuman na og swab test ang mga gikan og Region XI apan gi-require na usab og laing COVID-19 test pati na pag-isolate og 14 days.
“Kita diri sa Davao Region wala kaayo tay problema sa movement. Ang atong problema katong mugawas sa laing Region. Muadto ka sa laing lugar naay mga inconsistencies ug dili pare-pareho ang travel requirements,” matud niini.
Sumala niini, nakita pod nga problema nga dili dayon makapagula og Memorandum kung aduna nay mga ordinansa ang matag lugar diha sa ilahang mga travel requirements.
Angayang resolbahon ang mga inconsistencies ug parehason ang patakaran sa pagdawat sa mga travelers.
Gitataw ni Roldan, giestudyuhan karon sa legal team sa DILG kung unsaon pagresolba ngadto sa mga napanday na nga mga ordinansa sa matag LGUs diha sa mga travel requirements apan magkinahanglan kini’g panahon ilabina kung dili maistorya ang mga opisyales ug barugan nila ang ilahang mga rekwisitos sa pagdawat og mga tawo sa laing dapit.
RadyoMaN Aimee Guinita
