Subay sa inpormasyon nga nadawat sa 1001st Infantry Brigade gikan sa publiko kabahin sa presensya sa mga Suspicious Armed Persons sa La Filipina, Tagum City, Davao del Norte nilusad gilayon og joint operation ang kasundalohan ug Criminal Investigation and Detection Group Region XI.
Nasayran sa mga operatiba nga ang maong mga personalidad dagkong mga opisyales sa New People’s Army kinsa nag-atubang og patong-patong nga mga kasong kriminal.
Arestado human gisilbi ngadto kang Victor Rollon, alyas Go, Pong o Migo, bomb maker sa Komisyong Mindanao (Kommid) ug Southern Mindanao Regional Committee (SMRC) ang patong-patong nga warrant of arrests sa kasong Murder nga giisyu sa Branch 11, RTC 11, Tagum City, Davao del Norte niadtong May 6, 2015, Serious Illegal Detention gikan sa Branch 2, RTC 11, Tagum City; ug Robbery In Band nga gipakanaog gikan sa Branch 2, RTC11, Tagum City.
Dakpan usab ang Finance Officer sa Weakened Guerrilla Front 3, Sub-Regional Committee 4(SRC4), SMRC nga si Christine Joy Adorza Dula, Alias Rye/Rayray kinsa Wanted sa kasong Rebellion/Insurrection ilawom sa Crim Case # 1137-2021 nga giisyu sa Branch 57, RTC11, Mabini, Davao de Oro ug ang Political Instructor sa Pulang Bagani Command (PBC), Regional Operations COMMAND (ROC), SMRC nga si Chargelyn Monta Casquejo, alyas Gab o Jillian nga nag-atubang og kasong Homicide ilawom sa Criminal Case #2684-19 nga gipagula sa Branch 32, RTC11, Lupon, Davao Oriental.
Nakuha sa mga dinakpan ang duha ka mga Improvised Explosive Device, mga armas nga M16, .45 nga pusil nga walay mga serial numbers, magazines, mga bala, CPP NPA Documents ug uban pang mga kagamitan. Ang tulo ka mga suspek gikustodiya sa CIDG, Davao Del Norte Field Office.
Gisaludohan ni 1001st Brigade Commander BGEn Jesus Durante ang mga tropa sa malampusong operasyon taliwala sa peligrosong mga nadakpang sakop sa NPA.
Giawhag niini ang uban pang mga rebelde nga mu-surrender na sa gobyerno ug dawaton ang mga programa alang sa mga returness ilawom sa Enhanced Comprehensive Local Integration Program tungod kay hapit na ang hingpit nga pagkapuhag sa NPA sa ilang area of responsibility tungod sagad sa mga Hardliners napatay sa operasyon o nadakpan.
RadyoMaN Aimee Guinita
