Davao City – Dili na ma-itsura pa ang nawong sa usa ka binabaye gumikan sa pagburot sa duha niya ka mata ug aping ug nahiagoman nga bun-og sa kalawasan human tabangi og kulata sa mga tawo nakadakop kaniya sa usa ka subdivision sa Brgy. Hizon, Sasa ning siyudad 3:30 sa kadlawon.
Gihiktan ang mga kamot ug mga tiil sa suspek nga mao si Joseph Avenue, carenderia worker, 22 anyos ug nagpuyo Cuaco, Lanang ning dakbayan samtang gilamok og kulata sa mga tawo.
Sa report, misulod ang suspek og balay ug nangsakmit og cellphone nga iya nila Carmina Malate, 25 anyos, dalaga ug usa ka OFW.
Apan gidimalas si Joseph kay nabantayan siya sa mga biktima tungod sa kasikas niadtong tungora.
Mu-aksyon unta og sibat ang suspek apan na-corner kini sa mga tawo nga migukod ug mibun-og kaniya.
Narekober sa dinakpan ang cellphone nga iya sa mga biktima.
Nasayran nga ang suspek Notado nang kawatan ubos sa AOR sa Sasa PNP diin modus niini ang pagpamalbal og mga balay panahon sa kagabhion gani makapila na kini napriso sa miaging tuig apan wala lang madut-i og kaso sa mga nahimong biktima.
Pursigido mupasaka og kaso ang mga biktima aron matagam na kini sa iyang binuhatan.
RadyoMaN Joel Viray
