Davao City – Imbes na musumite sa iyahang kaugalingon atol sa pagpresenta sa kapulisan sa Davao del Sur sa warrant of arrest sa giatubang niining kasong child abuse ubos sa RA 7610 apan nakigpinusilay ang suspek hinungdan nga gipaulanan usab kinig bala sa mga operatiba sa may Purok Mangga, Ravina Compound, Zone 1, Digos City, Davao del Sur.
Giila ang suspek nga si Ernesto Placibe Jr., alyas “Pidot”, residente sa Sitio Biao, Cogon, Digos City.
Sumala sa Digos City Police nga daling gidala ang suspek sa Davao del Sur Provincial Hospital apan gideklara gilayon kining dead on arrival sa doktor.
Sumala sa mga awtoridad nga alegasyong mao kiniy lider sa IMAGO Group kinsa suspek sa pagpanulis ug kawat sa Digos City.
Narekober sa crime scene ang usa ka revolver ug mga bala.
Niadtong Enero 28 arestado usab ang kauban niining si alyas Idol kinsa kauban usab niini sa mga riot sa maong lugar.
Sumala ni Police Regional Office XI Regional Director P/Chief Supt. Marcelo Morales nga nagpadayon ang ilahang monitoring sa kalihukan sa mga kriminal dinhi sa Davao Region ug gisaad nga tapuson ang mga iligal ka mga aktibidad.
RadyoMaN Aimee Guinita
