Nagapabilin nga napriso sa Tigbauan Police Station si Gilbert Tuliba matapos maaresto sang mga katapo sang Regional Intelligence Division kag Tigbauan PNP pinaagi sa search kag arrest warrant.
Ginserbehan sang search warrant nga napetsahan June 17, 2020 nga gin-isyu ni Honorable Judge Nelita Jesusa Bacaling, Executive Judge sang RTC 6th Judicial Region sa Guimbal, Iloilo si Tuliba sa iya puluy-an sa Barangay 2 Poblacion, Tigbauan , Iloilo angut sa kaso nga paglapas sa RA 10591 ukon illegal possession of fire arms kadungan man sang pagserbe sa iya sang warrant of arrest angut sa kaso nga estafa nga gin-isyu ni Hon. Edgardo Castillo sang RTC Branch 23 sang Marso 10, 2015 kon sa diin may ginarekomendar nga 28 mil pesos nga piyansa para sa iya temporaryo nga kahilwayan.
Narecover kay Tuliba ang isa ka 45 caliber revolver kag mga bala.
Madumduman nga si Gilbert Tuliba ang gindakop man sang NBI sang 2009 bangud sa malapnagon nga reklamo batuk sa iya sa kaso nga pagpanunto ilabi na sa mga pamilya sang mga seaman.
Ini siya ang naggamit sadto sang mga aliases nga “Mark Anthony Siy”, “Mario Pelare”, kag “Edison Dizon”.
Magluwas sini, naggamit man siya sang lain-lain nga address kaangay sang “Silang, Cavite”, “Pototan, Iloilo” kag “Tigbauan, Iloilo”.
Modus sang suspek ang pagtawag sa pamilya sang mga seaman kag nagapahibalo nga may malain nga natabu sa ila himata sa barko kag kinahanglan sang daku nga kantidad para sa pagpa-ospital sini.
Ulihi na matukiban sang mga biktima nga ginatonto sila ni Tuliba kabangdanan nga ginreklamo ini sa NBI tubtub nga nadakpan sang 2009.
