Hugot nga gipanghimakak karon sa rehimeng Aquino ang akusasyon nga gi-‘hawshiao’ niini ang P3.5B Dengvaxia anti-dengue mega purchase.
Sa Joint Hearing sa Senate Blue Ribbon, Health & Finance panels sa Dengvaxia vaccine controversy, gitataw ni Former Pres. Benigno Simeon Aquino III nga walay dautang intensyon ang iyang pamunuan sa pagpalit sa P3.5B nga bakuna.
Si Noynoy nitambong sa joint deliberations isip usaka ‘resource person’ sa gikadudahang maanomalosong transaksyon.
Sa iyang written opening statement, giangkon sa kanhi pamuno-nasud nga nakigtagbo siya sa mga kadagkuan sa Sanofi Pasteur didto sa Paris France niadtong December 2015.
“My understanding was that Dengvaxia had undergone complete testing…No one advised me to stop (the purchase),” pagpatin-aw pa ni Noynoy.
Unang nigula ang teoriya nga napugos lamang si kanhi Health Sec. Janette Garin nga ipursigi ang pagpalit sa maong bakuna uban sa pag-ingon nga igo lamang siyang nagpatuman sa iyang mandato niadtong tungora.
Nasayran usab gikan kang kanhi health chief Paulyn Ubial nga aduna gayuy ‘pressure’ sa iyang kapanahunan gikan sa mga kadagkuan sa pamunuan lakip ang mga magbabalaud nga paspasan ang maong transaksyon.
Matud sa usaka opisyal sa World Health Organization (WHO) nga si Dr. Gundo Aurel Weiler, Country Representative, ang nasud-Pilipinas kwalipikadong mo-undertake sa Dengvaxia campaign.
Si Atty. Ferdinand Topacio, legal counsel sa grupong Volunteers Against Crime and Corruption (VACC) nirekomendar sa joint hearing nga kasuhan si Noynoy ug pipila ka mga health officials sa ‘plunder’ gumikan sa pagbinuang sa vaccine program, pag-freeze sa ilang mga bank accounts ug uban pang mga aksyon.
Matud ni Topacio, ang maong mga kanhi opisyales angay lamang manubag gumikan sa “indiscriminate, undue and indecent haste” sa pag-facilitate sa pagpamalit sa bakunang nagbutang na karon sa tumang kadelikado sa 830,000 ka mga kabataang napabakunahan.
RadyoMaN June Duterte
