TACLOBAN CITY – Gin-angkon han New People’s Army (NPA) an responsibilidad nga hira an nag-ambush kan Former San Jose De Buan Mayor Ananias Rebato tungod han gin-aaligar korapsyon ngan “counter-revolutionary acts.”
Ha press statement han Arnulfo Ortiz Command nga nag-ooperate ha probinsya han Samar, an NPA in nagpalusad hin death penalty para kan Rebato.
An 57 anyos nga Former Mayor in naka-angkon hin magkadurudilain nga igo hin pusil ha iya lawas dida han ala-1 han kaagahon han martes matapos umatinder hin fiesta activity ha Brgy. Babaclayon han nasabi nga bungto. Hi Rebato in stable na daw an kabutangan ha pagka-yana.
Pero an iya bodyguard ngan umangkon nga hi Severino Teroso in namatay.
Nakapapusil pa an bodyguard ni rebato nga nagresulta hin kamatay han usa ha upat nga suspek.
Gin-aaligar sumala han NPA nga dabi ha korapsyon an Former Mayor nga nagserbe dida han tuig 2007 tubtob 2006.
Pero sumala kan Captain Francis Agno, Spokesperson han 8th Infantry Division han Philippine Army, waray kamatuoran an allegasyon han npa.
Buotan daw nga mayor hi Rebato tungod nga personal ini nga kilala ni Agno dida han na-assign hiya ha San Jose De Buan.
