Davao City – Wala na makaagwanta pa ang lokal nga kagamhanan sa lungsod sa Mabini sa probinsiya sa Compostela Valley sa niluog nga binuhatan sa teroristang CPP-NPA-NDFP batok sa katawhan.
Tungod ani, si Sangguniang Bayan Member Edwin Salvaro miduso og resolution No.2019-116 aron ideklara nga persona non grata ang mga komunista sa ilang lungsod.
Kini gisuportahan usab ni Association of Barangay Captain President SB Member Romeo Aban ug sa tanang sakop sa sangguniang bayan nga gipirmahan ni Mayor Reynaldo Dayanghirang.
Nagpasabot niini nga dili na welcome sa katawhan sa bisan asang barangay sa lungsod Mabini ang mga terorista lakip na ang ilang mga kaalyadong mga organisasyon.
Nasayran nga nag-ugat ang hiniusang hukom sa mga opisyales nunot sa sunod-sunod nga binuhatan sa mga NPA sa pagpatay sa gidudahang mga espiya sa militar ug maingon man sa kasamok nga ilang gihatud sa pipila ka barangay sa maong lungsod.
RadyoMaN Joel Viray
