Davao City – Luwas na sa peligro ang kinabuhi sa gwardiya kinsa escort sa boom spray truck sa Dole Stanfilco human kini gibanhigan sa dili muubos sa napulo ka mga armadong grupo pasado alas 11:00 kaganinang buntag sa may Sitio Banarao, Brgy. Talandang, Tugbok District, Davao City.
Nakahiagom og samad pinusilan sa walang bahin sa iyang likod ug sa tuo nga paa ang biktima nga si John Batawan Corbala, 45 anyos, sakop sa Masis security Agency ug taga-Barangay Ganatan, Arakan, North Cotabato.
Sa interbyu sa DXDC RMN Davao kang Tugbok PNP OIC station commander PSI Omelito Sobrecarey nga nagpadayon pa ang man hunt operasyon sa mga kapulisan uban ang kasundaluhan sa mga suspetsado nga gituohang mga sakop sa New People’s Army.
“Naa siguro silay mga plano nga sunugon o wala lang nadayon kay tungod naay gwardiya nga ga-escort ug nakuan sa gwardiya ang ilang plano. Sa among pagimbestiga didto ang gipangita nila ang boom truck. Naa man puy armas ang gwardiya pagtira nakabantay ug nibalos ang gwardiya ug mura’g sab nasamdan sa pikas pod,” sumala ni Sobrecarey.
Narekober sa crime scene ang 11 ka mga gituohang bala sa 5.56 caliber ug 2 pa ka bala sa wala pa nadeterminar nga armas nga gikan usab sa usa ka high powered firearms.
Human sa insidente gidagit sa mga suspek ang motor nga gisakyan sa sekyu nga Honda XRM nga color red ug black.
Padayon pang nagpaalim sa Southern Philippines Medical Center ang samarang gwardiya.
RadyoMaN Aimee Guinita
