Davao City – Naila na sa otoridad ang usa sa mga NPA nga namatay sa nahitabong engkwentro sa Barangay Astorga, Sta. Cruz, Davao del Sur niadtong Abril 21, 2018, adlawng Sabado.
Sa report nga gipagula ni Eastern Mindanao Command spokesperson Major Ezra Balagtey nga base sa report sa 39th Infantry Battalion, Philippine Army, nailhan ang maong namatay human ang identification process nga gihimo PNP-SOCO, Municipal Social Welfare Office sa Sta. Cruz, Davao Del Sur ug sa Military.
Na-identipaka ang namatay nga si alyas “Ron”, 15 anyos ug taga Sitio Tombo, Brgy Old Bulatukan, Makilala, North Cotabato.
Matud pa nga giila kini sa iyang inahan nga si alyas “Maria” sa dihang gidala ang patayng lawas niini sa Funeral Parlor sa Sta. Cruz, Davao del Sur atol sa public identification.
Ang patayng lawas sa maong NPA narekober sa tropa sa gobyerno human sa engkwentro sa nasangpit nga area diin lakip narekober mao ang M16 Rifle.
Gipangdala na karon ang mga patayng lawas sa NPA sa ilang nagkadaiyang pamilya lakip ang namatay nga kumander nga giilang si Julito Pueblas alias Taghoy, 62 anyos nga taga Sitio Pangayasan, Brgy Kisante Old Bulatukan samtang ang naarestong amasona nga si Jessa Lumana, balhug na karon sa Sta Cruz Municipal Police Station aron atubangon ang mga criminal charges.
Samtang gikondena karon ni Lt. Gen. Benjamin Madrigal Jr., Commander sa Eastern Mindanao Command ang paggamit sa NPA sa mga menor de edad diha sa pagpakigbisog diin padayon nilang panawagan sa pikas pundok nga mu-surrender na ug mubalik sa sabakan sa gobyerno.
RadyoMaN Renz Barbarona
