Nagpaguwa sang official statement ang Coronacion Chiva Waling-waling Command NPA-Panay bilang reaksyon sa nangin pahayag sang damlag lang ni Presidente Rodrigo Duterte sang magbisita ini sa Camp Hernandez, Dingle, Iloilo.
Sa nasambit nga official statement nga ginbasa ni Ka Julio Montana, spokesman sang nasambit nga grupo, mabaskog nila nga ginapakamalaut ang pahayag ni Presidente Duterte nga nagamandu sa militar nga magpatay sang mga rebelde nga NPA kag pagahatagan sang padya ang mga ini.
Ginhatagan pagtamod sang NPA nga ang ginahimo sang presidente nagapatimaan nga wala ini sa husto nga paminsaron.
Magluwas sini, ginapakita man kuno sang presidente nga ang gobyerno mismo amo ang terorista sa ginahimo sini nga pagmandu sa militar nga pugutan sang ulo ang mga NPA kag luthangon sa kinatawo ang mga rebelde nga kababaihan.
Madumduman nga ginpahayag man ni Presidente Duterte nga iya bayaran sang 25 mil pesos ang sin-o man nga suldado nga makapatay sang ordinaryo nga NPA kag 50 mil pesos kon lider naman ang mapatay.
