Davao City – Gibutyag sa National Telecommunications Commission (NTC)-XI nga maayo ang nahimong performance sa DITO Telecommunity nga gikatakdang magbaton sa ilang commercial launch dinhi sa Davao City ug Cebu City sa March 8, 2021.
Sa interbyu sa DXDC RMN Davao kang Nelson Cañete, NTC-XI Regional Director, gibutyag niini nga taas ang rating sa NTC atol sa pag-audit ug pag evaluate sa performance target sa maong telco, butang nga ilang gikalipay.
“Kami sa NTC, nalipay ‘mi ana nga mag launch na sila (DITO) karong March. In fact, bag-o lang man sila gihimuan og audit ug ang NTC central office malipayon kaayo sa ilang performance. Kung mag-launch sila sa March 8, gina-welcome namo aron nga mahatagan nato og laing avenue ang mga tao nga nanginahanglan og saktong internet speed,” saysay ni Cañete.
Gipasabot ni Cañete nga posibilidad ang pagbaton og problema kung mamalhin na usab ang tanan sa DITO telco tungod kay mabug-atan na usab kini, rason nga kinahanglang mabalanse ang katawhan diin posibleng magbaton na usab og maayong serbisyo ang ginareklamong daang telcos tungod kay makuhaan na man ang subscribers sa nahisgutan.
“Dili nato pwede nga ingon tanang tawo nga mubalhin kang DITO. Kay kung mao ‘nay mahitabo, mabug-atan lagi si DITO, dili niya mahatag ang saktong serbisyo kung daghan siya’g customers. Kusog na man ‘ning duha ka telcos (Smart ug Globe). Ang problema lang kay daghan sila’g subscribers,” tataw ni Cañete.
Nanghinaut ang NTC-XI Regional Director nga masolusyonan na ang problema sa hinay nga internet speed sa Pilipinas pinaagi sa dugang telecom provider nga misulod sa nasud.
RadyoMaN Kirby Manzon
