Davao City – Anaa sumala pa sa kapin kun kulang 40 ka mga radio stations sa Davao region ang girekomenda sa National Telecommunications Commission (NTC)-XI nga ipasirado kun isyuhan og cease and desist order.
Sa interbyu sa DXDC RMN Davao kang Nelson Cañete, regional director sa NTC-XI, gibutyag niini nga sa milabay nga tuig anaa sa kapin 30 ka istasyon sa radyo ang mga naga operate nga walay klarong paples ug karon nga tuig muabot na kini og 40 ug posibleng mutaas pa ang ihap kung dili ma-aksyunan.
Gikatarongan sumala pa sa nahisgutan nga nag apply na sila sa central office apan segun ni Cañete nga kini wala nagpasabot nga mamahimo na silang mag-operate tungod kay posible pa kining dili ma-aprubahan.
“Ang uban muingon nga nag-apply naman mi sa central office pero ang application is not a permit. Application, it be denied. So meaning to say, wala gyud kay permit. Isa pa nag apply pa man ka, dili pa gyud ka permitee,” saysay ni Cañete.
Saysay ni Cañete nga “unfair” sumala pa sa mga adunay lisensya ang pag operate sa mga radio stations nga walay saktong dokumento.
Dugang sa NTC-XI regional director nga ang NTC central office na usab ang magdesisyon labot sa ilang rekomendasyon.
RadyoMaN Kirby Manzon
