NTC XI nag-warning batok fake links sa sim registration

Davao City – Gipaigmat sa National Telecommunications Commission (NTC)-XI ang publiko kalabot sa mga link nga ilang madawat pinaagi sa text alang sa pag-register sa ilahang Subscriber Identity Module (SIM) cards.

Sa interbyu sa DXDC RMN Davao kang Nelson Cañete, regional director sa NTC-XI, gibutyag niini nga daghang mga naga-text karon ilabi na sa nagapadayong SIM resgistration, rason nga angay mahimong alerto ang katawahan aron malikayan nga ma-scam o mailad.

“Kung ang mugawas diha pangalan sa telco., Globe ba na, Talk ‘n Text or Smart, legit na. Unya aduna may naga-text uban nga number ray mugawas. Unya, naay instances nga kanang number mugawas, pag-click nimo sa link nga please register your (SIM), nagtuo kang ga-register ka. Wala. Gahigop diay sila sa imong GCash,” saysay ni Cañete.

Gipasabot sa NTC-XI regional director, risgo gihapon ang publiko sa text scams hangtud nga dili pa hingpit ma-rehistro ang SIM cards.

As of February 6, 2023, anaa na sa 30 million SIM cards ang narehistro ug nagpadayon karon ang ginahimong remote registration.

Gitakda ang deadline sa SIM registration sa April 6, 2023, matud sa NTC-XI official.

RadyoMaN Kirby Manzon