NTC-XI: Seniors i-assist sa SIM registration

Davao City – Nagpadayon karon ang ginahimong remote registration alang sa Subscriber Identity Module (SIM) cards ilabi na niadtong mga area nga adunay kalisod sa internet connection.

Sa interbyu sa DXDC RMN Davao kang Nelson Cañete, Regional Director sa National Telecommunications (NTC)-XI, gitambagan niini ilabi na kadtong mga batan-on nga mas nakahibalo sa internet nga tabangan ang ilang mga miyembro sa pamilya nga marehistro ang ilahang SIM cards.

“So kadtong mga batan-on nga maayo man anang mga online-online, i-assist ninyo pud kana si nanay ninyo, si tiya ninyo, si lola ninyo. Para unya dili na mahasol na’ng mga senior citizen nga muadto pa sa mga remote registration (venues),” segun ni Cañete.

Karong adlawa, Pebrero 10, 2023, adunay remote registration nga himuon sa Padada, Davao del Sur partikular na sa Padada municipal gymnasium. Samtang, sa laing mga lokalidad na usab himuon ang aktibidad sa sunod nga mga semana.

Subling gipasabot sa NTC-XI official nga human sa deadline sa SIM registration sa Abril 26, 2023, i-deactivate na tanang SIM cards nga dili rehistrado.

RadyoMaN Kirby Manzon