Sa interview sa DXDC RMN Davao kang Nelson Cañete, Regional Director sa NTC-XI, iyahang gisaysay nga luyo sa balaod sa SIM Registration, dili basta-basta ma-trace ang mga tag-iya sa SIM tungod sab sa Data Privacy Act.
Gipasabot ni Cañete nga pipila sa criteria sa legal nga pagproseso sa pagkuha og impormasyon sama sa pag-ila sa SIM card owner mao kung duna kini consent sa tag-iya, kung dunay imbestigasyon sa awtoridad kung dunay krimen, kung dunay court order, ug uban pa. Diin ang maong mga butang, dili mamahimong basehan batok sa text scams.
“Kinahanglan nato estudyohan og balik ang balaod tungod kay naa ta’y balaod sa SIM card registration pero usahay nag-conflict sila sa Data Privacy Act. So, naay duha ka balaod nato nga proteksyon unta ‘ni sa mga tao pero ang nahitabo, dili lang tanang tao ang naproteksyonan kundi apil na usab ang mga scammer,” saysay ni Cañete.
Gibutyag usab ni Cañete nga nakadawat sab sila og reports nga bisan og wala narehistro ang SIM, ma-activate gihapon kini. Giklaro niya nga dili kini sala sa NTC kundili kini obligasyon na sa telecommunications service provider.
RadyoMaN Kirby Manzon
