Davao City – Girekomenda karon sa National Telecommunications Commission (NTC-XI) sa Department of Education (DepEd) nga tugotang mutabang sa abri-klase ang mga radio stations bisan og wala kini lisensya.
Atol sa One Davao on COVID-19 Virtual Presser, gibutyag ni Nelson Cañete, Regional Director sa NTC-XI, nga pwedeng mahimong ‘replay’ stations ang maong mga sibyahanan sa learning materials nga i-play sa mga licensed radio stations.
“Gi-ingnan nako ang DepEd kanang mga unlicensed radio stations nga gusto man na’ng mutabang (sa abri-klase) patabangon na lang na sila siguro pero dili lang kontratahon kay basin ma-isyuhan namo og cease and desist order unya mao ra poy gisaligan sa DepEd basin og madaut ang pag eskwela sa mga bata,” esplikar ni Cañete.
Nasayran nga sunod semana na, Oktubre 5, 2020 ang opisyal nga pagsugod sa abri-klase karong tuiga diin walay ipatumang face-to-face classes gumikan sa Coronavirus Disease 2019 (COVID-19) Pandemic.
RadyoMaN Kirby Manzon
