Ginkalipay sang Palasyo sang Malacañang ang resulta sang survey sang Social Weather Stations (SWS) angut sa hunger rate sa pungsod.
Sa survey nga ginpatigayon sang December 16 tubtob19, naggwa nga 10.5 % o 2.4 ka milyon nga pamilya ang naka-eksperyensya sang isa ka beses nga pagkagutom sa nakalipas nga tatlo ka bulan .
Mas manubo ini sang 2.8 points sa 13.3% o 3.1 ka milyon nga pamilya nga narecord sang September 2018.
Suno kay Chief Presidential Legal Counsel kag Presidential Spokesman Secretary Salvador Panelo, consistent man ini sa resulta sang isa ka survey kon sa diin, ginapahayag nga nagnubo man ang numero sang mga Pilipino nga nagahambal nga pigado sila.
Ginpahayag ni Panelo nga nagakahulugan lang nga nabatyagan sang mga Pilipino ang mga ginahimo nga tikang sang gobyerno agud mangin masulhay ang pangabuhi sang mga Pilipino nga amo man ang rason kon ngaa mataas ang trust kag approval ratings ni Presidente Rodrigo Duterte.
