i Balita
November 02, 2019
(Photo from web)
NUMERO SANG MGA NAGBISITA SA PANTYON SANG ILA MINATAY SA SYUDAD SANG ILOILO SUBONG NGA TUIG, NAGNUBO
Nagnubo ang numero sang mga nagbisita sa sementeryo kahapon kadungan sang pagselebrar sang piyesta minatay kon ikumpara sang nagliligad nga mga tinuig.
Suno kay Mr. Darwin Papa, ang head sang Iloilo City Disaster Risk Reduction and Management Office (CDRRMO) ,posible nga ini tungod man sa long weekend.
Dugang pa ni Papa nga nagnubo man sang halos 30% ang mga na-record nga insidente sa syudad kaangay sang mga naglain ang pamatyag, mga nasagairan sang salakyan kag mga napilasan.
Sa record sang Operation Center sang syudad sa Oplan Kalag-kalag 2019 sang city government, ginabulubanta nga naglab-ot sa 64, 000 ka tawo ang nagpadulong sa mga sementeryo sa syudad kahapon, Nobyembre 1.
Naglab-ot sa 62 ka tawo ang nadakpan sang mga pulis nga may dala nga mga patalum kag ginadumilian nga mga bagay sa sulod sang patyo.
Pila sa mga ginpangkumpiskar ang mga kutsilyo, cutter, sigarilyo, mga makahulubog nga ilimnon, blades kag iban pa.
