Roxas City, Capiz- Hugot nga ginpabutyag ni Mambusao Mayor Leodegario “Jun” Labao nga sa iya nga tagipusuon, upod sa gihapon ini sa National Unity Party ukon NUP party subong man kay Capiz 2nd District Congressman Deputy Speaker Fredinel Castro. Suno diri nga sa pihak sang mga patutsada nga iya ginbuy-an sa provincial government sang nakaligad nga binulan, nagapabilin sa gihapon ang koalisyon sa tunga sang NUP party sa second district kag sa Partido Liberal. Ginpunto ni Labao nga ang nasambitan nga bagay ang isyu gid lamang kag nagapabilin sa gihapon nga siya ang membro sang NUP nga ginapamunoan ni Congressman Fredinel Castro. Sa madumdoman nga nangin unod ang balita sang nakaligad nga mga binulan ang mga pagbatikos ni Labao sa government ospital sa Mambusao kag ang mga napabay-an kag wasak nga provincial road sa nasambitan nga banwa nga nangin rason man sang deklarasyon sini nga nakahanda siya nga magpapili sa pagka-gobernador sa masunod nga eleksyon sa 2019. Sang nakaligad nga adlaw, surprisa nga nagbisita si Labao sa kapitolyo agod nga personal nga imbitahon si Governor Tony del Rosario sa mass oathtaking sang mga nagdalaog nga barangay officials sang Mambusao sa maabot nga Hunyo 25. Mainit naman ini nga ginbaton ni Gov. Tony del Rosario kag ginpasalig sang gobernador nga magahatag ini sang budget balor P4-million pesos para sa proyekto sa tulay sa Brgy. Bula.
